Podfm.ru

Жывая чытанка: Юры Гумянюк (1969-2013) (1)

Tue, 12 Feb 2013 19:32:00 +0400

Перадача з цыклю "Жывая чытанка" на Радыё Рацыя (Беласток).
Этэр ад 16.09.2009

Рацыя ў Зоне (4) (слайдкаст)

Wed, 23 Jan 2013 14:11:00 +0400

Рацыя ў Зоне. Частка 4: пакінутая Прыпяць (эфір 7.12.2007 на Радыё Рацыя, FM 98,1 Беласток, Горадня, FM 99,2 Берасьце)

Вандроўка ў 30-кіламэтровую зону адчужэньня: Дзіцяткі-Чаравач-Залесьсе-Капачы-Чарнобыль-ЧАЭС-Прыпяць

Музыка: Krou/CpB

Рацыя ў Зоне (3) (слайдкаст)

Tue, 22 Jan 2013 12:10:00 +0400

Рацыя ў Зоне. Частка 3: недабуд ЧАЭС (эфір 6.12.2007 на Радыё Рацыя, FM 98,1 Беласток, Горадня, FM 99,2 Берасьце)

Вандроўка ў 30-кіламэтровую зону адчужэньня: Дзіцяткі-Чаравач-Залесьсе-Капачы-Чарнобыль-ЧАЭС-Прыпяць

Музыка: Kardon

Рацыя ў Зоне (2) (слайдкаст)

Fri, 18 Jan 2013 13:09:00 +0400

Рацыя ў Зоне. Частка 2: жылы Чарнобыль (эфір 5.12.2007 на Радыё Рацыя, FM 98,1 Беласток, Горадня, FM 99,2 Берасьце)

Вандроўка ў 30-кіламэтровую зону адчужэньня: Дзіцяткі-Чаравач-Залесьсе-Капачы-Чарнобыль-ЧАЭС-Прыпяць

Музыка: Голая манашка

Рацыя ў Зоне (1) (слайдкаст)

Thu, 17 Jan 2013 12:52:00 +0400

Частка 1: закапаныя Капачы (эфір 4.12.2007 на Радыё Рацыя, FM 98,1 Беласток, Горадня, FM 99,2 Берасьце)

Вандроўка ў 30-кіламэтровую зону адчужэньня: Дзіцяткі-Чаравач-Залесьсе-Капачы-Чарнобыль-ЧАЭС-Прыпяць

Музыка: КальЯн - Радыёактыўны сьнег

Белы сьпіс: Vincent (5)

Fri, 07 Dec 2012 13:28:00 +0400

Сёньня ў нас завяршальная частка размовы з Вінсэнтам, музыкам ды акторам. Падзялюся такім сваім назіраньнем: шмат хто з шчырых беларусаў адчувае сябе ў сваёй талерцы, калі выязджае ў Беласток, Вільню, Варшаву, а ў сябе дома пачуваюцца нібы ў гасцях. Ці адчувае сябе чужынцам у сваёй краіне Вінсэнт?

Белы сьпіс: Vincent (4)

Thu, 06 Dec 2012 12:22:00 +0400

Госьцем "Белага сьпісу" на гэтым тыдні Зьміцер Папко, вядомы ў музычным і акторскім асяродку, як Вінсэнт. Сёлета карера досыць пасьпяховага музыканта набыла досыць нечаканы працяг у кірунку кіно. Зьмітра запрасілі сыграць адну з роляў у першым беларускім моладзевым сэрыяле "Вышэй за неба", а потым ён выканаў галоўную ролю ў стужцы "Жыве Беларусь". Калі выпускнік журфаку і музыка-самавук адкрыў для сябе, што мае акторскія здольнасьці?

Белы сьпіс: Vincent (3)

Wed, 05 Dec 2012 11:16:00 +0400

Мы працягваем гутарку з Вінсэнтам, адным з самых яркіх выканаўцаў на цяперашняй беларускай незалежнай сцэне. Як і ў шмат каго з маладых музыкаў-пачаткоўцаў, у яго была спроба заігрываньня з дзяржаўнымі мэдыямі. На пачатку кареры Вінсент зняў парачку кліпаў ды разаслаў іх на тэлеканалы і радаваўся, як дзіцё, калі яго паказвалі ў этэры. Але потым неяк неўпрыкмет музыка зьнік з экрану. Што ж адбылося і ці канчаткова ён вырашыў спаліць за сабой масты?

Белы сьпіс: Vincent (2)

Tue, 04 Dec 2012 11:36:00 +0400

Вінсэнт паходзіць з тых жа мясцінаў, што і Тадэвуш Касьцюшка. Ён пайшоў вучыцца на журналіста, хоць ведаў, што наўрад ці калі-небудзь будзе працаваць па гэтай спэцыяльнасьці. Яму марылася пра музычную сцэну. І гэтую мару рэалізаваў яшчэ ў часы вучобы.

Літаральна за некалькі год Вінсэнт прайшоў шлях ад няўпэўнега ў сябе рэпера-пачаткоўцы да сапраўднай зоркі беларускага маштабу, які здольны сабраць на свой сольны канцэрт поўную залю. Ужо на першым сваім дыску, што зваўся "Пачатак" выканаўца прапанаваў сьпелы творчы прадукт. Ён вылучаўся магутнай падачай, выдатным адчуваньнем мэлёдыі, чысьцюткай мовай, зусім няглупымі тэкстамі. Калі ж сам Вінсэнт адчуў у сябе рэальную моц?

Белы сьпіс: Vincent (1)

Mon, 03 Dec 2012 12:22:00 +0400

Vinsent (сапраўднае імя - Дзьмітры Папко) - музыка і актор.

Нарадзіўся 3 кастрычніка 1988 году ў Івацэвічах. Скончыў Інстытут журналістыкі БДУ па спэцыяльнасьці "Тэлебачаньне і радыё" (2011).

Музычную кареру пачаў у 2007 годзе. Першы выступ адбыўся на Дзень беларускай мовы ў Інстытуце журналістыкі. Тады ж запісаў свае першыя творы ў рэп-стылістыцы і ў кароткі час стаў адным зь лідэраў свайго кірунку. Двойчы ўздымаўся на першую прыступку чарту на "Тузіне Гітоў" зь песьняй "Адыходзяць караблі" (2008).

У 2009 годзе выдаў дэбютны альбом "Пачатак" і зьняў кліп на песьню "Восеньскі вальс" (рэж. Зьміцер Карначык, Алесь Меліхавец). Кліп быў адзначаны на фэстывалях "Street Awards" і "Кліп-маратон". Яшчэ адзін кліп на песьню "Ні кроку назад" (2012) стаў саўндтрэкам да фільму "Вышэй за неба".

Сьпяваў у дуэце з шэрагам беларускіх выканаўцаў, у тым ліку з гуртамі :B:N:, IQ48, Аляксандрам Патлісам.

Адмыслова для фільму "Жыве Беларусь" запісаў некалькі песень на словы Лявона Вольскага.

У 2011 годзе сабраў жывы склад і з гэтага моманту выступае выключна ў суправаджэньні гурту. У 2011 годзе выйшаў "Жывы DVD", на якім сабраныя відэапрацы, лайв-кліпы з канцэртаў, аўдыёзапісы з выступаў.

Як актор кіно пачаў кареру ў 2012 годзе. Сыграў ролю беларускамоўнага музыкі Макса ў фільме "Вышэй за неба" Дзьмітрыя Марыніна і Андрэя Курэйчыка, заяўленага як першы моладзевы беларускі сэрыял.

Зьняўся ў галоўнай ролі Мірона Захаркі ў фільме "Жыве Беларусь" (Польшча - Францыя, рэж. Кшыштаф Лукашэвіч). Прэмера стужкі заплянаваная на 2013 год.

Удзельнік міжнародных фэстываляў "Басовішча" (Польшча), "Бандэрштат" (Украіна), "Tautų mugė" (Летува), акцыі "Салідарныя зь Беларусьсю" (Польшча).

Белы сьпіс: Слава Корань (5)

Fri, 30 Nov 2012 21:36:00 +0400

Ulis - адна з першых рок-камандаў у сучаснай Беларусі, якая паспрабавала бізуна ад уладаў ды падпала пад забарону яшчэ ў 1995 годзе. У той час ужо Слава сам сьпяваў уласныя тэксты. Да ўсьведамленьня сябе беларусам Корань, які, дарэчы, нарадзіўся ў Пскове, ішоў доўгі час.

Белы сьпіс: Слава Корань (4)

Thu, 29 Nov 2012 13:48:00 +0400

На гэтым тыдні мы размаўляем пра гісторыю гурта "Уліс" ды беларускую рок-музыку ў цэлым з Славам Коранем, саўнпрадусарам шэрагу культавых альбомаў ад "Новага неба", НРМ і ды заснавальніка гурта "Уліс". Дзіўная рэч здарылася зь яго камандай - пасьля выдатнага альбому "Танцы на даху" у 1993 годзе Слава набірае абсалютна новы склад музыкаў, сам бярэцца пісаць тэксты ды яшчэ і вырашае сам сьпяваць і сам сябе запісваць. Ён усьведамляў, што атрымаецца ўсё неадразу. І тады здарыўся ўнікальны выпадак у гісторыі нашай музыкі: сам музыка спыніў продаж свайго альбому.

Белы сьпіс: Слава Корань (3)

Wed, 28 Nov 2012 13:28:00 +0400

Госьцем "Белага сьпісу" на гэтым тыдні - Слава Корань, славуты беларускі гітарыст і лідэр гурта "Уліс". Выкажу чыста сваё меркаваньне, зь якім магчыма пагодзіцца шмат хто яшчэ. Тое, што зрабіў "Уліс" пры канцы 80-пачатку 90-х ёсьць вяршыняй беларускай рок-музыкі. На жаль, недасягальнай. У альбомах каманды Славы Кораня "Чужаніца", "Краіна доўгаай белай хмары" і "Танцы на даху" сыйшлося ўсё: высокая якасьць запісу, шыкоўная музыка, цудоўны вакал Андрэй Патрэя, а потым Алега Тумашова і, канечне ж, выдатная паэзія Фелікса Аксёнцава. Задаю стваральніку "Уліса" трошкі правакацыйнае пытаньне - дык чыя галоўная заслуга ў тым, што атрымаўся такі цуд?

Белы сьпіс: Слава Корань (2)

Tue, 27 Nov 2012 13:23:00 +0400

Гісторыя Славы Кораня, як музыкі пачалася ў 1978 годзе, калі ён сканчаў Радыётэхнічны інстытут у Менску па спэцыяльнасьці "аўтаматычныя сыстэмы кіраваньня". Тады ён прыйшоў у студэнцкі гурт "Ліфт" і настолькі захапіўся музыкай, што вырашыў зьвязаць зь ёй жыцьцё назаўжды. Потым ён стане гітарыстам адной з першых беларускамоўных рок-камандаў "Бонды".

Белы сьпіс: Слава Корань (1)

Mon, 26 Nov 2012 21:07:00 +0400

Вячаслаў Корань - гітарыст, вакаліст, саўндпрадусэр, аўтар музыкі і тэкстаў, лідэр гурту Ulis.

Нарадзіўся 16 сьнежня 1955 году ў Пскове (Расея) у беларускай сямі ваеннага доктара. Зь пяці год жыве ў Беларусі. Скончыў Радыётэхнічны інстытут у Менску па спэцыяльнасьці "Аўтаматычныя сыстэмы кіраваньня" (1978).

У музыцы з 1978 году. У якасьці гітарыста граў у менскіх рок-камандах "Ліфт" (1978-1982), "Студыя 7" (1982-1984), "Бонда" (1982-1988).

У 1988 годзе заснаваў гурт Ulis, у якім першапачаткова быў гітарыстам і пісаў музыку. З 1994 году ўзяў на сябе таксама ролю вакаліста і аўтара тэкстаў гурту. Выступаў таксама ў якасьці гітарыста гурту "Новае неба" (1994-1999) і праекту "Народны альбом" (з 1997).

Разам з гуртам браў удзел у першым фэстывалі "Басовішча" (1990) і быў нязьменным яго хэдлайнэрам цягам наступных 15 год.

Удзельнік першага фэсту "Рок па вакацыях" (1993) ды шэрагу наступных. Браў удзел таксама ў фэстывалях "Тры колеры" (1989-1990), "Рок чыстай вады" (Менск, 1990), "Сырок" (Масква, 1990), "Музыканты сьвету дзецям Чарнобылю" (Менск, 1991), Rock Summer (Талін, 1991), Rock-mafia (Сопат, 1991), 29th Sopot Festival (1992), "Салідарныя зь Беларусьсю" (Варшава, 2006), Be Free (Украіна, 2007-2008).

Мае ўзнагароду як найлепшы гітарыст фэстывалю "Тры колеры", тры прызы фэстывалю "Басовішча" і рок-карону за "Найлепшы альбом" на "Рок-Каранацыі-1997" (у складзе праекту "Народны альбом"). Неаднаразова выходзіў на сцэну разам з зоркамі сусьветнага маштабу, такімі, як Jethro Tull і The Stranglers.

На пачатку 90-х Ulis выступіў з сэрыяй канцэртаў у Нямеччыне, Вялікабрытаніі і Польшчы. Першы альбом гурту "Чужаніца" (1990) быў выдадзены вялізарным накладам на фірме "Мэлёдыя" (Расея), другі - "Краіна белай хмары" (1991) - выйшаў таксама на кружэлках на буйным польскім лэйбле "Polskie nagrania", пасьля чаго ў Варшаве быў заснаваны і доўгі час дзейнічаў фэн-клюб гурту. Дагэтуль дзейнічае фэн-клюб гурту ў Менску.

Усяго мае ў дыскаграфіі 12 альбомаў, запісаных у складзе розных калектываў. З 1989 году выступае таксама як саўндпрадусар. У гэтай якасьці запісаў шэраг культавых альбомаў беларускага року, як "LaLaLaLa", "Одзірыдзідзіна", "Пашпарт грамадзяніна N.R.M." гурту N.R.M., "Мая краіна" і "Цэпэліны" гурту "Новае неба". У 2007 годзе стаў саўнпрадусарам маладой рок-каманды з Полацку "Indra".

Неаднаразова запрашаўся ў журы фэстываляў "Басовішча" і "Бардаўская восень".

Зараз жыве і працуе ў Варшаве.

Белы сьпіс: Ігар Варашкевіч (5)

Fri, 23 Nov 2012 18:16:00 +0400

Сёньня ў нас завяршальная частка размовы з Ігарам Варашкевічам. Яго гурт "Крама" часьцяком вінавацяць у кансэрватызме і ў тым, што музыкі рэдка радуюць новымі альбомамі, ды і ўласна новымі песьнямі. Гурт і сапраўды выдае альбомы гады ў рады. Апошні выйшаў пяць год таму. Бачна, што зь цягам часу і прыхільнікаў у "Крамы" становіцца менш, складаецца ўражаньне, што гурт проста забываюць. Пра ня вельмі прыемную тэму страты папулярнасьці сёньня і паразмаўляем з Ігарам.

Белы сьпіс: Ігар Варашкевіч (4)

Thu, 22 Nov 2012 13:15:00 +0400

Ігар якраз быў адным з першых, хто ўжо ў сучаснай нібы суверэннай Беларусі адчуў, што такое быць непажаданай асобай у дзяржаўных мэдыях. На піку папулярнасьці "Крамы" у 1996 годзе нечакана прыбіраюць з этэру кліп гурта "Гомельскі вальс", а тэлезапіс іх канцэрту з нагоды 5-годзьдзя гурта зьнішчаецца. Але поўнае ўсьведамленьне таго, што ў краіне адбываюцца жахлівыя рэчы, якія лягічга вытлумачыць проста немагчыма, прыйдзе да яго пазьней. І тады Варашкевіч напіша свой першы тэкст, праўда выканаць яго публічна ня возьмецца.

Белы сьпіс: Ігар Варашкевіч (3)

Wed, 21 Nov 2012 12:47:00 +0400

У мінулай перадачы мы размаўлялі з лідэрам "Крамы" Ігарам Варашкевічам пра тое, чаму склалася так, што яго гурт цяпер фактычна нікому не патрэбны. Між тым, на пачатку 90-х усё магло скласьціся для "Крамы" інакш. Тады беларускія музыкі перамаглі ў сурёзным расейскім фэстывалі "Поколение", апярэдзіўшы знаных цяпер расейскіх музыкаў. Імі зацікавіліся ў Вялікабрытаніі, дзе быў выдадзены ангельскамоўны варыянт дэбютніка "Хворы на рок-н-рол". Прычым на дысках, што ў 1993 годзе яшчэ было вялікай рэдкасьцю.

Белы сьпіс: Ігар Варашкевіч (2)

Tue, 20 Nov 2012 11:06:00 +0400

Беларускай музыцы моцна пашанцавала, што ў яе прыйшоў Варашкевіч. Але вялікае пытаньне ці пашэнціла самому Варашкевічу ў сувязі з тым, што ён вырашыў зьвязаць сваё жыцьцё з рок-н-ролам у дадзены час і ў дадзеным месцы. Не разумеюць Варашкевіча з калегамі - і ўсё тут. Мы размаўлялі з Ігарам па яго вяртаньню з Рыгі, куды "Крама" паехала з канцэртам. У адрозьненьні ад "Ляпіса Трубяцкога", што выступаў трошкі пазьней у Вільні, на "Краму" ніхто не прыйшоў. Таму пачуцьці музыканта абсалютна зразумелыя. Суайчыньнікі фактычна не прынялі і яго колішнюю каманду "Бонда", што грала у 80-х ў актуальнай на той час ва ўсім цывілізаваным сьвеце стылістыцы "новай хвалі".

Белы сьпіс: Ігар Варашкевіч (1)

Mon, 19 Nov 2012 12:34:00 +0400

Ігар Варашкевіч - вакаліст, кампазытар, гітарыст, мастак, лідэр гурта "Крама".
Нарадзіўся 15 жніўня 1960 году ў Баранавічах. Скончыў Беларускі дзяржаўны тэатральна-мастацкі інстытут (цяперашняя Акадэмія мастацтваў) па спэцыяльнасьці "інтэрер " (1987).
Музычную кареру пачаў у 1982 годзе ў складзе гурта "Студыя 7". У 1984 годзе стаў адным з заснавальнікаў гурта "Бонда", які лічыцца разам з гуртом "Мроя" пачынальнікам беларускага незалежнага року. Пасьля распаду "Бонды" у 1991 годзе сьпяваў у складзе гурта "Рокіс". У 1993 годзе стаў нязьменным вакалістам і аўтарам музыкі да песень гурта "Крама".
"Крама" дэбютуе ў 1993-94 годзе з альбомам "Хворы на рок-н-рол", удзельнічае ў "Басовішчы", "Славянскім базары", "Маладзечна", перамагае ў расейскім конкурсе "Поколение", становіцца ўладальнікам вялікай Рок-Кароны на першай цырымоніі "Рок-Каранацыя-94", запісвае і выдае для брытанскага рынку адзін з першых беларускіх CD "Vodka in ice" - ангельскамоўную вэрсію дэбютнага альбому. Таксама атрымлівае ўзнанагароды на "Рок-Каранацыі" у 1995г. ("За адданасьць жанру"), у 1999 г. і 2009г. ("Традыцыі і сучаснасьць"), у 2001г. (за "Альбом году"), у 2004-2005г., як "Найлепшы блюз-рок выканаўца".
У 1996 годзе "Крама" сутыкаецца зь першымі праблемамі. Кліп на песьню "Гомельскі вальс" здымаецца з этэру БТ, а тэлезапіс іх канцэрту з нагоды 5-годзьдзя зьнішчаецца. У 2003 годзе пасьля выступу на мітынгу апазыцыі трапляе ў негалосны сьпіс забароненых рок-гуртоў. Пасьля сустрэчы рок-музыкантаў у адміністрацыі прэзыдэнта песьні ў выкананьні Варашкевіча часова вяртаюцца ў этэр дзяржаўных мэдыяў, гурт бярэ ўдзел у праектах каналаў СТВ і ОНТ, аднак пасьля падзеяў 19 сьнежня 2010г. "Крама" ізноў апынаецца пад негалоснай забаронай.
Усяго Варашкевіч разам з гуртом запісаў сем студыйных альбомаў. Удзельнічаў у музычных праектах "Песьнярок", "Personal Depeche", "Салідарны зь Беларусьсю" ды іншых. Разам з гітарыстам "Песьняроў" Віктарам Маўчанавым заснаваў праект "Цмок і малыш", зь вядомым расейскім блюзмэнам Мікалаем Аруцюнавым заснаваў праект "Варвары блюзу". Працаваў таксама з гуртом Apple Tea. У розныя часы ўдзельнічаў у запісах альбомаў іншых выканаўцаў ад "Сузоря" (1984г.) да "Indiga" (2006г.). Як мастак у 2008 годзе зладзіў пэрсанальную выставу сваіх працаў разам з Нікай Сандрас.

Белы сьпіс: Аляксандар Ракавец (5)

Fri, 16 Nov 2012 11:03:00 +0400

Так сталася, што самыя знакавыя і вялікія выступы гурта IQ48 адбыліся за мяжой. Можна тут прыгадаць фэстываль Be2gether, дзе беларусы выступілі на адной сцэне з знакамітымі на ўвесь сьвет выканаўцамі з Morcheeba і Therapy? ці на акцыі "Салідарны зь Беларусьсю" у самым цэнтры Варшавы, ці на ўкраінскім фэсьце "Дзень Незалежнасьці з Махно", ці на "Басовішчы", дзе некалькі год запар музыкі былі аднымі з хэдлайнэраў. Толькі вось у Беларусі на іх упарта не зьвярталі ўвагі. Тым больш было дзіўна пабачыць іх неяк у этэры на дзяржаўнай тэлевізіі за размовай з адыёзным дыктарам Аверкавым. Было гэта ў часы ўяўнай лібералізацыі, якая скончылася вельмі хутка. Саша Ракавец кажа, што ён раз і назаўжды вырашыў для сябе не выступаць на прадзяржаўных мерапрыемствах.

Белы сьпіс: Аляксандар Ракавец (4)

Thu, 15 Nov 2012 12:57:00 +0400

Яшчэ за часамі існаваньня свайго першага гурта "Эпіцэнтр" Саша Ракавец падкладаў пад біт словы з купалаўскай "Спадчыны". Рабілася тады гэта яшчэ не зусім сьвядома, але мінула 10 год і музыкант разам з сваімі паплечнікамі зьвярнуўся да літаратурнай клясікі ўжо на поўным сурёзе. , каб, як ён сам кажа, "замуціць" нешта зусім новае. Асаблівы піетэт вакаліст гурта IQ48 займеў да Францішка Багушэвіча, а верш Янкі Купалы палічыў за варты тэкст для сучаснага рок-гіта.

Белы сьпіс: Аляксандар Ракавец (3)

Wed, 14 Nov 2012 12:24:00 +0400

Пра беларускую сталіцу песень складзена нямала, аднак згадваецца толькі дзьве зь іх, у якія закладзены сапраўдныя эмоцыі. Безумоўна гэта "Менск і Мінск" Лявона Вольскага і "Схаванае сэрца" Міхала Анемпадыстава з выдатнай фразам "Што ты робіш са мной, мой горад-герой". Менавіта песьню-гісторыю Міхала пра горад, які мы з кожным годам страчваем, пранікнёна выканаў карэнны менчук Саша Ракавец з гуртом IQ48. Яго думкі якраз і зьяўляюцца тыповымі для сьвядомага жыхара сталіцы: ён мысьліць сябе толькі тут і цяпер, але назваць горад сваім ня можа.

Белы сьпіс: Аляксандар Ракавец (2)

Tue, 13 Nov 2012 12:04:00 +0400

Гурт IQ48 літаральна ўварваўся ў беларускую музычную тусоўку і ўсяго за якіх пару год стаў на адну прыступку з тымі камандамі, якіх прынята лічыць красой і сілай айчыннага року. Беларускамоўныя трэкі сталі пераважаць у іх рэпертуары, а пасьля перамогі на "Басовішчы-2003" творы па-расейску наогул зьніклі зь іх сэт-лістоў. Гульня з разнастайнымі стылямі і беларускамоўныя рыфмоўкі, якія з хуткасьцю гуку прагаворваў Саша Ракавец, сталі іх адметнасьцю і вылучылі сярод астатніх. Падобнага ў нашай музыцы дагэтуль ніхто не рабіў. Слухачы іх палюбілі. Тады і нарадзіўся сярод прыхільнікаў слёган гурта - "здаровыя лосі".

Белы сьпіс: Аляксандар Ракавец (1)

Mon, 12 Nov 2012 17:08:00 +0400

Аляксандар Ракавец - рэп- і рок-выканаўца, аўтар песень і вакаліст гурту IQ48.

Нарадзіўся 27 жніўня 1982 году.

Пасьля школы скончыў ПТВ - 94, а потым факультэт аўтаматызацыі і абсталяваньня машынабудаваньня менскага Політэхнічнага каледжа, атрымаў спэцыяльнасьць "тэхнік-мэханік". Працаваў на менскім заводзе колавых цягачоў старшым майстрам.

У музыцы з канца 90-х гадоў. Пачынаў як рэп-выканаўца ў гурце "Эпіцэнтар".

У 2001 годзе далучыўся ў якасьці аднаго з вакалістаў да гурту IQ48. У 2003 годзе ў складзе гурту стаў пераможцам фэстывалю "Басовішча-2003". Пасьля сыходу Паўла "Фройда" Зыгмантовіча ў 2004 годзе стаў франтмэнам і аўтарам часткі песень каманды.

Разам з гуртам IQ48 запісаў тры студыйныя альбомы: "Варяты" (2005), "Героі" (2008), "HMR" (2011).

Браў удзел у буйных фэстывалях за мяжой - Be2gether (2007), BeFree (2008), "Дзень Незалежнасьці з Махном" (2008), акцыі "Салідарны зь Беларусьсю" ў Варшаве. Сталы ўдзельнік гасьцявой часткі "Басовішча".

У якасьці запрошанага вакаліста браў удзел у навагодніх праектах Лявона Вольскага, у гуртах Hasta la Fillsta, Zet Family.

Белы сьпіс: Піліп Чмыр (5)

Fri, 09 Nov 2012 22:36:00 +0400

Часам здаецца, што некаторыя абсурдныя рэчы могуць здарыцца толькі ў нашай краіне. Напрыклад, шэсьце фізкультурнікаў падчас дзяржаўнага параду на неўцямны дзень незалежнасьці пад музыку гурта, які лічыцца забароненым. Такая сытуацыя адбылася якраз з Drum Ecstasy. Прычым музыка ў бубначоў была папросту скрадзена. Як сьведчыць лідэр каманды Філ Чмыр, з такімі сытуацыямі ён сутыкаецца вельмі часта. Сёньня даведаемся, хто крадзе музыку ў Філа, чаму гурт не здымае кліпаў і паслухаем самую запатрабаваную песьню самай ударнай беларускай каманды.

Белы сьпіс: Піліп Чмыр (4)

Fri, 09 Nov 2012 01:03:00 +0400

Прысутнасьць твайго імя або назвы тваёй каманды ў "чорным сьпісе" мае як ня дзіўна, як свае плюсы, так і свае мінусы. Некаторыя зь яго фігурантаў пазбавіліся афіцыйнай працы, этэраў на радыё і тэлебачаньні ды шматлікіх бонусаў і прывілеяў, а некаторыя скарысталіся гэтай сытуацыяй на сваю карысьць ды толькі выйгралі з таго. Але ўсіх яднае адно - іх памалу выціснулі непасрэдна з тутэйшай культурнай прасторы. Ці хоць у нечым дапамог статус забароненага артыста ў Беларусі лідэру гурта Drum Ecstasy?

Белы сьпіс: Піліп Чмыр (3)

Thu, 08 Nov 2012 13:19:00 +0400

Калі музыкі з гурта Drum Ecstasy знаходзяцца на сцэне, то слова ад іх не пачуеш. Яны выконваюць інструмэнтальную трансавую, як правіла танцавальную музыку, на жывых ударных інструментах, часам яшчэ лідэр гурта бярэ ў рукі бас-гітару, а то і выкарыстоўвае бэнзапілу ці вогнетушыцель для належнага гукавога эфекту. Але не праз гукі, якія яны ўтвараюць на сцэне, музыкі трапілі ў сьпіс непажаданых творчых асобаў. А проста ад таго, што яны жадаюць неадемных рэчаў і адкрыта пра гэта кажуць у інтэрвію. Вось і ў нашай размове Філ Чмыр загаварыў пра такую абсурднасьць сытуацыі.

Белы сьпіс: Піліп Чмыр (2)

Tue, 06 Nov 2012 12:09:00 +0400

Філ Чмыр - асоба цікавая і супярэчлівая. Ён мае шэраг спэцыяльнасьцяў і праявіў сябе ў шматлікіх сфэрах дзейнасьці, пры тым, што мае толькі сярэднюю адукацыю. Ён абезьдзіў усю Эўропу, але нават не падумаў там застацца. Пасьля шматразовага наведваньня Парыжа і Рыма, Берліна і Капенгагена, ён адкрывае для сябе прыгажосьць і чароўнасць беларускіх гарадоў. Ён упарта называе сябе менчуком, але ня лічыць сябе беларусам. Яго гурт - унікальная фармацыя. Музыкі сабраліся разам 20 год таму з адной мэтай - скарыць сваім барабаным бітам цэлы сьвет. Спачатку суполка звалася "Група імя каралеўскага геаграфічнага абяднаньня, што выступае ў стыле барабаннага экстазу", а потым назву спрасцілі да Drum Ecstasy ды паехалі па Эўропе.

Філ Чмыр разам з паплечнікамі рэдка грае ў звыклых для звычайнага музыкі месцах. Дзе толькі не выступаў гурт Drum Ecstasy - у полі ды ў лесе, на спартовых спаборніцтвах і нелегальных вечарынах, у эўрапейскіх пабах ды вялізарных выставачных комплексах. У Менску музыкі штогод на працягу дзесяцьцігодзьдзя ладзілі нелегальныя канцэрты пад мастом у парку імя Горкага і потым давалі дзёру ад міліцэйскага патруля разам з гледачамі. Прашу Філа прыгадаць самае дзіўнае месца, у якім давялося выступіць за гэтыя 20 год канцэртнай дзейнасьці.

Белы сьпіс: Піліп Чмыр (1)

Mon, 05 Nov 2012 13:37:00 +0400

Піліп Чмыр - заснавальнік, музыкант і дырэктар гурта Drum Ecstasy, актор, мастак, фатограф, рэжысэр.

Нарадзіўся 30 траўня 1968 году ў Менску. Скончыў сярэднюю школу ў 1985 годзе і больш нідзе не вучыўся. Самастойна авалодаў і працаваў па спэцыяльнасьцях: машыніст сцэны, загадчык пастановачнай часткай у Дзяржаўным моладзевым тэатры. Ммэнеджар спэцыяльных праектаў, крэатар, рэжысэр у рэклямнай агенцыі "Рэфортэ".

З 1987 году ўваходзіць у арт-суполку "Беларускі клімат". У 1993 годзе заснаваў Drum Ecstasy - квартэт выканаўцаў на ўдарных інструмэнтах. З гуртом браў удзел у прома-акцыях сусьветна вядомых брэндаў, дабрачынных канцэртах, экалягічных праектах, нелегальных акцыях, у спартовых мерапрыемствах, у тым ліку ў адкрыцьці чэмпіянату Літвы па баскетболе, выставачных гульнях НХЛ у Маскве ды інш. Гурт мае чатыры запісаных праграмы. Музыка Drum Ecstasy гучыць у расейскіх фільмах "Дневной дозор", "Ночной дозор", "Гитлер капут", "Самый лучший фильм", "Тёмный мир", у сэрыяле "Мужчины не плачут", а таксама ў новым беларускім фільме "Селітра - 7".

Запісаў дзьве сольныя праграмы: "Сола для баса" (1997) і "Перашкоды і націскі" (разам з Зьмітром Плаксам, 2011).

Белы сьпіс: Руся (5)

Fri, 02 Nov 2012 12:29:00 +0400

Сёньня завяршальная частка нашай размовы з Русяй, большасьці вядомай напэўна, як рок-вакалісткай. Складаецца такое ўражаньне, што пасьля гурта Indiga Руся ня можа засяродзіцца на пэўным праекце, аднак гэта ня так. Яна ўшчыльную занялася беларускім фальклорам ды ва ўсю экспэрымэнтуе ў справе злучэньня нашых даўніх сьпеваў з сучаснымі музычнымі напрамкамі. Паколькі думак на гэты конт мае багата, то і праектаў існуе некалькі. Дык што на гэты момант зьяўляецца для сьпявачкі прыярытэтам і як яна хоча, каб яе ўспрымалі цяпер слухачы?

Белы сьпіс: Руся (4)

Thu, 01 Nov 2012 11:30:00 +0400

Ці ня кожны беларус раней ці пазьней адчувае смак роднай мовы. Да Русі такое адчуванне прыйшло пасьля таго, як паэт Андрэй Хадановіч дапамог ёй зь перакладам песень і яе каманда Indiga атрымала ўзнагароду на фэстывалі "Басовішча". Недзе тады, у 2003 годзе, Руся зразумела, што для сьпеваў, для самавыяўленьня ды проста ў побыце ёй больш за ўсё пасуе родная мова. І павязалася зь беларускім словам назаўжды.

Белы сьпіс: Руся (3)

Wed, 31 Oct 2012 12:37:00 +0400

На дзесятай цырымоніі "Рок-Каранацыя" зьдзейснілася мара юнацтва Русі і яе прызналі беларускай рок-князёўнай. Калі пра гэта абвесьцілі, павіншаваць сьпявачку проста з залі выйшаў на той час кандыдат у прэзыдэнты Беларусі Аляксандар Мілінкевіч. Да выбараў тады заставаліся з два тыдні і тая напруга ў грамадзтве з гэтай нагоды відавочнна адбілася і на самой рок-цырымоніі. Пабачыўшы, як Мілінкевіч уручае кветкі вакалістцы гурта Indiga, гурт J:Морс вырашыць па сваю галоўную рок-карону на сцэну не выходзіць. Але самой Русі не было страшна ані тады, ані цяпер.

Белы сьпіс: Руся (2)

Tue, 30 Oct 2012 11:36:00 +0400

Жыцьцё першага гурта Русі Indiga было цікавым і насычаным, але нядоўгім. Усе ключавыя моманты ўклалілся літаральна ў тры гады. Гурт стаў пераможцам "Басовішча", выдаў першы і, як высьветлілася пазьней, апошні студыйны альбом "Дні", Русю прызналі за "рок-князёўну". І ўсё на гэтым. Яна сышла з рок-сцэны ды зьвярнулася да каранёвай беларускай музыкі. А паўплывала на гэтую зьмену канкрэтная падзея, што здарылася ў краіне.

Белы сьпіс: Руся (1)

Mon, 29 Oct 2012 11:44:00 +0400

Марына Шукюрава (Руся) - сьпявачка, акторка, дасьледчыца
Нарадзілася 15 сакавіка 1980 году ў вёсцы Церахоўка на Гомельшчыне. Скончыла Рэчыцкі прафэсійна-пэдагагічны коледж па спэцыяльнасьці настаўніца беларускай мовы і літаратуры і ангельскай мовы (2000), факультэт міжнародны адносін БДУ па спэцыяльнасьці "перакладчык" (2006), вучылася ў Эўрапейскім гуманітарным ўнівэрсітэце на дасьледчыка візуальнай прасторы (2007).
Музыкай займаецца з 15 год. У 2001 годзе стала вакалісткай гурта Indiga. У яго складзе прызнаная пераможцай фэстываля "Басовішча" (2003), а на цырымоніі "Рок-Каранацыя-2005" атрымала статус "рок-князёўны". Разам з гуртом запісала альбом "Дні", тэксты для якога створаны ў суаўтарстве з Андрэем Хадановічам, а таксама сынгл "Заенька" з удзелам Ігара Варашкевіча ("Крама") і суполкі электронных прадусараў "Backlab collective" (Аўстрыя). Як запрошаная вакалістка супрацоўнічала з гуртамі Partyzone, Hasta La Fillsta. Удзельнічала ў супольным музычным праекце "Такога няма нідзе" (2009). З 2007 году шчыльна займаецца фольк-музыкай, становіцца салісткай гурта Akana і беларуска-швайцарскага праекту Kazalpin, працуе таксама ў плыні электроннай музыкі разам з гуртом CherryVata. У 2011 заснавала ўласны сольны праект Shuma, у якім спалучае народныя сьпевы з электроннай музыкай. У 2012 годзе працуе таксама з новым праектам CityZen.
Супрацоўнічала ў якасьці музычнага журналіста, рэдактара і прадусара праграмаў з "Радыё Рацыя" і "Эўрарадыё", як перакладчык і актор дубляжа агучвала на беларускую мову замежныя фільмы і мультфільмы для тэлеканала "Белсат". Удзельнічае ў адукацыйных і сацыяльных праектах у Беларусі і па-за яе межамі.

Белы сьпіс: Алесь Дзянісаў (5)

Fri, 26 Oct 2012 13:25:00 +0400

Сёньня - завяршальная праграма "Белы сьпіс" з цыклю, прысьвечанага Алесю Дзянісаву, лідэру гурта "КальЯн", дужа папулярнаму ў асяродку аматараў беларускай музыкі на мяжы стагодзьдзяў. Гісторыя сусьветнай музыкі ведае прыклады, калі музыкант з актыўнай пазыцыяй па жыцьці зьвязваў шчыльна сваё жыцьцё з палітыкай. Але Дзянісаў таго не зьбіраецца рабіць. Хаця кажа, што калі б зьявілася арганізацыя падобная да польскай "Салідарнасьці", то ён быў бы ў першых шэрагах.

Белы сьпіс: Алесь Дзянісаў (4)

Thu, 25 Oct 2012 10:54:00 +0400

Алесь Дзянісаў прызнае, што пратэстны патэнцыял у нашым грамадзтве цяпер непараўнальна меншы за тыя часы, калі яго гурт "КальЯн" запісваў першыя альбомы, тады яшчэ на касэтах. Пры гэтым ён сам ня збочыў з абранай каляіны, хоць і разумее, што аўдыторыя істотна зьмянілася цягам 15 год існаваньня яго гурта. Дык што сталася зь беларускай моладзьдзю за гэты даволі кароткі адрэзак часу?

Белы сьпіс: Алесь Дзянісаў (3)

Wed, 24 Oct 2012 11:14:00 +0400

Алесь Дзянісаў зусім не адпавядае стэрыятыпнаму вобразу панк-музыканта. Ён на дзіва мяккі і чулы чалавек, які мае пераканасьць у тым, што ўсё тое дабро ды станоўчая энергія, якая сыходзіць ад цябе, да цябе ж і вяртацца. Можа камусьці падацца дзіўным, але Дзянісаў, песьні якога прасякнуты атмасферай неўладкаванасьці, неспакою ды адвечнай барацьбы, лічыць сябе шчасьлівым чалавекам.

Белы сьпіс: Алесь Дзянісаў (2)

Tue, 23 Oct 2012 14:16:00 +0400

Звычайна бывае як? Пабавіліся музыканцікі ў школьныя і студэнцкія часы пратэстным рокам, а з надыходам дарослага жыцьця зарынуліся ў будзённыя клопаты, зрэдчас хіба з усьмешкай згадваючы юнацкія гады. Але гэта не гісторыя героя сёньняшняга "Белага сьпісу". Алесь Дзянісаў зьяўляецца проста ўзорам прынцыповасьці, ці тое нават зацятасьці, што да поглядаў на жыцьцё. Яго пазыцыя застаецца нязьменнай з тых самых часоў, калі ён заснаваў панк-гурт "КальЯн" у сярэдзіне 90-х. Пра матэрыяльныя даброты ён проста ня думае, а жыве чыста творчасьцю, без падладжвання пад стэрыятыпы. Але ці няма ў яго адчуваньня, што ён у абсалютнай меншасьці і яго песьні гэта ўсяго толькі крык у пустэчу?

Белы сьпіс: Алесь Дзянісаў (1)

Mon, 22 Oct 2012 14:27:00 +0400

Алесь Дзянісаў - музыкант, рок-паэт, заснавальнік гурту "КальЯн".

Нарадзіўся 26 сакавіка 1975 году ў Горадні. Скончыў школу-ліцэй - 1 (1992), факультэт гісторыі і сацыялёгіі Гарадзенскага дзяржаўнага ўнівэрсытэту (1997). З 1997 да 2007 гг. працаваў настаўнікам гісторыі і грамадзкіх навук, клясным кіраўніком у сярэдняй школе - 15.

Звольніўся на ўласнае жаданьне. Цяпер працуе незалежным журналістам.

Сябра БАЖ.

Музычную кареру пачаў у 1993 годзе. Граў на гітары ў гурце "Гематаген" (1993-1994).

У 1996 годзе разам са Зьмітром Антаневічам заснаваў гурт "КальЯн", які працуе ў стылістыцы "фольк-панку".

За час свайго існаваньня гурт запісаў восем альбомаў. Першы электрычны альбом "У краіне цудаў" (1997) быў выдадзены ў спліце з гуртам "Deviation" у Польшчы.

У 1998 годзе "КальЯн" узяў Гран-пры на фэстывалі "Басовішча".

У 2008 годзе, зноў жа ў Польшчы, зьнятыя кліпы на песьні "Барацьба" і "Радыеактыўны сьнег".

У 2011 годзе песьня "Радыеактыўны сьнег" была прызнана галоўным беларускім антыядзерным гітом.

Апошні па часе дыск мае назву "Антыпазытыў" (2011).

У 2011 годзе Алесь Дзянісаў заснаваў новы музычны праект "Людзі на балоце".

У 2012 годзе стаў адным з заснавальнікаў і ўдзельнікаў панк-рок-фармацыі "Dzieciuki".

Жанаты. Мае 10-гадовую дачку.

Белы сьпіс: Аляксандар Кульлінковіч (5)

Sat, 20 Oct 2012 12:25:00 +0400

Сёньня завяршальная праграма, прысьвечаная Аляксандру Кульлінковічу ды яго гурту "Нейра дзюбель". На адным з апошніх паўпадпольных канцэртаў выканаўца выказаў спадзяваньне са сцэны, што раней ці пазьней музыкі дадуць канцэрт у Палацы спорту, дзе яны, дарэчы выступалі ў сярэдзіне 90-х. Тады музыкі былі частымі госцямі ў тэлеэфіры і актыўна канцэртавалі. А зараз каб выйсці на сцэну, вымушаныя часам прыдумляць іншую назву. На адной з "Рок-Каранацый" яны былі прадстаўлены, як гурт "Віп", што расшыфроўвалася, як "Выпіць і паплакаць", на іншым фэсьце яны назваліся "Кул оркестра", а адзін з канцэртаў далі пад назвай "група веласіпедыстаў". Тым ня менш Кульлінковіч не губляе аптымізму і хоча быць пачутым у сваёй краіне.

Белы сьпіс: Аляксандар Кульлінковіч (4)

Thu, 18 Oct 2012 10:11:00 +0400

Госьць праграмы "Белы сьпіс" на гэтым тыдні Аляксандр Кульлінковіч. У яго гурта зараз ня лепшыя часы, хоць музыкі знаходзяцца ў выдатнай форме. Адна толькі назва "Нейра дзюбель" выклікае жах у ідэалягічных супрацоўнікоў, таму яны практычна не маюць канцэртаў. Нягледзячы на тое, што "дзюбеля" двойчы забароненыя, у саміх музыкаў няма адчуваньня, што яны ідуць насуперак сыстэме.

Белы сьпіс: Аляксандар Кульлінковіч (3)

Wed, 17 Oct 2012 11:36:00 +0400

Нядаўна "Нейра дзюбель" справіў 23-годдзе сваёй дзейнасці і перажыць за гэты час давялося багата чаго. Быў час росквіту, а здараліся моманты, калі гурт быў на мяжы распаду. Тым ня менш, сёньня Кульлінковіч з калегамі працягваюць актыўна рэпетаваць і пішуць ужо 14-ты нумарны альбом. Дык якія пэрспектывы ў Беларусі бачыць Аляксандар і якая сіла трымае музыкаў столькі год ?

Белы сьпіс: Аляксандар Кульлінковіч (2)

Tue, 16 Oct 2012 10:33:00 +0400

Каманда Кульлінковіча была хіба адзінай, каго ўсурёз успрымалі ў беларускамоўнай тусоўцы ў 90-х. Хоць сам выканаўца і пяяў па-расейску, але кожнаму было зразумела, што гэтыя песьні, створаныя тут. Рэдкасьць на тыя часы - расейскамоўны "Нейра дзюбель" паклікалі выступаць на цалкам беларускамоўны на тыя часы фэстываль "Басовішча", а Мулявін уручаючы прыз, як лепшаму гурту году на "Рок-Каранацыі" сказаў, што яго меркаваньне супала з выбарам журы. Сам Кульлінковіч ня раз заяўляў, што любіць сваю Радзіму, хай сабе і выказвае тую любоў расейскімі словамі. А пасьля таго, як да яго трапіў томік Караткевіча, ён вырашыў засьпяваць на сваёй мове. На той час "Нейра дзюбель" меў у дыскаграфіі 8 альбомаў. Пытаюся ў Аляксандра, ці не цяжка было перайсці на беларускую?

Белы сьпіс: Аляксандар Кульлінковіч (1)

Mon, 15 Oct 2012 19:28:00 +0400

Аляксандар Кулінковіч - заснавальнік, вакаліст і аўтар песень гурту Neuro Dubel.

Нарадзіўся 18 траўня 1972 году ў Смалявічах.

У Менску жыве зь пяці год.

Скончыў ПТВ-23 па спэцыяльнасьці "сантэхнік", адвучыўся адзін курс на факультэце журналістыкі ў БДУ, працаваў у моладзевых выданьнях.

Быў калюмністам парталу Naviny.by і аўтарам часопіса "Sexus".

Вершы і музыку піша з 1985 году.

17 ліпеня 1989 году заснаваў гурт Neuro Dubel, лідэрам якога застаецца па сёньня. Мае 11 запісаных альбомаў. Піша песьні па-расейску, а з 2000 году і па-беларуску.

Мае 10 перамогаў у розных намінацыях "Рок-Каранацыі", у тым ліку як "Гурт году" (Галоўная Рок-Карона) у 1998 і 2007 гг. У 1998 годзе атрымаў прыз з рук Уладзімера Мулявіна, зь якім разам выканаў "Вологду" ў панк-рокавым варыянце.

Сьпяваў таксама разам зь Лявонам Вольскім, Ксеніяй Сітнік, Алегам Хаменкам, Гюнэш Абасавай.

Браў удзел у супольных музычных праектах "Скрыпка дрыгвы" (ня выдадзены), "Крамбамбуля" (2003), "Салідарны зь Беларусьсю" (2006).

Жанаты. Сыну 12 год.

Белы сьпіс: Наста Шпакоўская (5)

Fri, 12 Oct 2012 10:36:00 +0400

Наста якраз з той катэгорыі творцаў, якім неабыякава тое, што адбываецца наўкол. Наста ніколі не маўчала, калі бачыла, што адбываецца несправядлівасьць, хоць ёй і было што губляць. Колісь яна разгарнула цэлую кампанію па абароне гітарыста каманды, які апынуўся ў ліку затрыманых падчас падзеяў на Плошчы ў 2006 годзе ды сказала сваю слова ў падтрымку касьцёла Сьвятога Язэпа, які забралі ў вернікаў. Не засталася яна ў баку і ад падзеяў, што адбыліся ў сьнежні 2010-га году ды шмат якіх іншых. Пры тым, Наста ўсьведамляе, ШТО можа страціць, але слова "боязь" для яе не існуе.

Відэавэрсія праграмы "Белы сьпіс" пра Насту Шпакоўскую - ссылка

Белы сьпіс: Наста Шпакоўская (4)

Thu, 11 Oct 2012 15:47:00 +0400

Гісторыя гурта Naka сьведчыць, што музыкі ставяць досыць амбітныя задачы і дасягаюць іх. Творчасьць гэтай каманды мае добрыя водгукі ў суседняй Расеі. Ужо колькі год беларусаў запрашаюць на буйныя рок-фэстывалі за мяжой. Аднак замацаваць сваю папулярнасьць прынамсі на постсавецкай прасторы каманда ня можа, бо Наста аніяк ня хоча скарыцца патрабаваньням рынку. А калі казаць прасьцей - ёй папросту ня пішацца вясёлых і лёгкіх песень.

Белы сьпіс: Наста Шпакоўская (3)

Wed, 10 Oct 2012 15:23:00 +0400

Госьцем гэтага тыдня ў "Белым сьпісе" - Наста Шпакоўская, вакалістка гурта Naka. Летась на пачатку году яна напісала песьню пад назвай "Всех забрали", якая стала ў пэўным сэнсе пераломнай для яе гурта. У тым пляне, што менавіта з гэтага моманту ў музыкаў пачаліся цалкам рэальныя праблемы - іх творы ў Беларусі зьнялі з ратацый, выступаць з канцэртамі стала таксама праблематычна. Працытую заяву гурта тых часоў з нагоды прэзентацыі гэтага трэка: "Мы адрасуем сваё пасланне тым людзям з разумнай галавой і чыстым сумленнем, якія змагаюцца за свае правы ў Беларусі, Расеі, Тунісе, Эгіпце...Не магу лішні раз не заклікаць прадстаўнікоў улады заглянуць да сябе ў душу, каб адказаць на галоўнае пытаньне - што застанецца пасьля мяне?". Што думае Наста пра той свой учынак цяпер і як паўплывалі рэпрэсіўныя меры ў дачыненьні да гурта на яе думкі і творчасьць - пра гэта і пагутарым сёньня.

Белы сьпіс: Наста Шпакоўская (2)

Tue, 09 Oct 2012 14:12:00 +0400

Творчасьць гурта Naka застаецца пераважным чынам расейскамоўнай, але менавіта аўтарству Насты належыць адна з самых яркіх песень апошніх год, прысьвечаная нашай сымболіцы. Ясна, што такі твор мог нарадзіцца ў душы чалавека, якому баліць ад таго, што адбываецца з краінай.

Белы сьпіс: Наста Шпакоўская (1)

Mon, 08 Oct 2012 15:58:00 +0400

Наста Шпакоўская - сьпявачка, лідэр гурту "Naka", акторка тэатра і кіно.

Нарадзілася 28 верасьня 1979 году ў Менску.

Навучалася ў тэатральнай студыі ў Барыса Луцэнкі (1996-1998), скончыла Беларускую дзяржаўную акадэмію мастацтваў па спэцыяльнасьці "актор драматычнага тэатру і кіно" (2004). Грае ў тэатры з 1999 году.

Была задзейнічаная ў пастаноўках спэктакляў "Князь Вітаўт" у тэатры імя Купалы, "Раскіданае гняздо", "Сунічная паляна", "Эдып", "Бег", "Гора ад розуму" ды іншых у тэатры імя Горкага. Грала Рагнеду ў тэлефільме "Беларусь на скрыжаваньні стагодзьдзяў" (1999), здымалася ў стужках "Любоўныя гісторыі" (2000), "Дастыш фантастыш" (2009).

У 2004 годзе заснавала гурт Naka, які атрымаў вядомасьць спачатку ў Расеі, дзякуючы ўдзелу ў буйных конкурсах і фэстывалях (у тым ліку "Крылья-2006" на аэрадроме ў Тушына), а таксама творчаму саюзу з гуртам "Барто".

Кліп на сумесную з "Барто" песьню на тэму глябальнага крызісу мае больш за 300 000 праглядаў на Youtube.

"Naka" запісала два альбомы - "Тебе" (2005) і "Пора" (2010). На цырымоніі "Рок-Каранацыі-2009" Наста Шпакоўская прызнаная "Рок-князёўнай". Апошнія свае песьні запісала дуэтам зь Янам Маўзэрам і Зьмітром Вайцюшкевічам.

Белы сьпіс: Аляксандар Памідораў (5)

Fri, 05 Oct 2012 10:25:00 +0400

Завяршальная праграма "Белы сьпіс" з цыклю, прысьвечанага Аляксандру Памідораву. У мінулай частцы музыкант якраз прызнаўся, што спецпрыз на "Рок-каранацыі", атрыманы 10 год таму для яго куды важней за галоўную рок-карону, прысуджаную яму на гэтай жа цырымоніі сёлета. На якой музыкант нават вырашыў не выступаць. Дык што сталася за гэты караценькі адрэзак часу зь ім ці тое з беларускай музыкай?

Белы сьпіс: Аляксандар Памідораў (4)

Thu, 04 Oct 2012 08:56:00 +0400

У дыскаграфіі Pomidor/off гурта ўсяго толькі два альбомы, выдадзеныя з перапынкам практычна ў 10 год. Затое абедзьве працы яўна можна запісаць у галоўныя здабыткі сучаснага беларускага року. І калі першы дыск прайшоў неяк незаўважна, то нядаўную працу Памідорава "Патас/попс/ прапаганда" журналісты расхвалілі на ўсе лады. Дыск увайшоў у тройку найлепшых беларускіх альбомаў году на экспэртах бай. Песьня "Дым" была прызнанай найлепшай песьняй году на "Рок-Каранацыі", а гурт атрымаў тое, пра што ім калісьці марылася - галоўную рок-карону. Але ці цешыць самалюбства Памідорава статус рок-караля сёньня?

Белы сьпіс: Аляксандар Памідораў (3)

Wed, 03 Oct 2012 10:02:00 +0400

У асяродку беларускіх музыкаў першым беларускім рэперам прынята лічыць Францішка Багушэвіча. І надалі аднаму з пачынальнікаў новай беларускай літаратуры гэты статус не зусім каб і жартам. Нашы выканаўцы заўважылі, што яго вершы сапраўды добра кладуцца пад біт і вельмі пасуюць для чытаньня ў хуткай манеры. Пісаліся тыя тэксты пры канцы 19-стагоддзя, а скарысталіся імі ўжо на пачатку 21-га. Сярод тых, хто натхніўся Багушэвічам быў і герой сёньняшняга "Белага спісу" - Аляксандр Памідораў, якому ўласна і належыць аўтарства першага ўцямнага беларускага рэпу, ці прынамсі нечага блізкага да гэтай стылістыкі, створанага на беларускай мове. Гаворка пра адзін з галоўных беларускіх радыёхітоў канца мінулага стагоддзя - "Цуд на Каляды", які ўвайшоў у супольны музычны праект "Сьвяты вечар". Напэўна з гэтай песняй творчасць Памідорава і будзе асацыявацца заўжды.

Белы сьпіс: Аляксандар Памідораў (2)

Tue, 02 Oct 2012 15:18:00 +0400

Памідораў - унікум. Бо можа вольна пачувацца ў якім заўгодна музычным стылі. І справа тут не ў вакальных дадзеных, а ў яго харызьме і ў выдатным адчуваньні, як мэлёдыі, так і слова. Памідораў-музыкант разьвіваўся адразу ў некалькіх кірунках. Ён граў рок-н-ролы, спрабаваў сілы ў гіп-гопе ды гард-коры, нават пісаў у стылістыцы блатнога шансону. Быў яшчэ адзін імаверны шлях разьвіцьця, які падказвала яго паходжаньне.

Белы сьпіс: Аляксандар Памідораў (1)

Mon, 01 Oct 2012 14:02:00 +0400

Аляксандар Памідораў (сапр. Аляксандар Крывашэеў) - музыкант, шоўмэн, журналіст, лідэр гурта Pomidor/OFF.

Нарадзіўся 21 сьнежня 1971 году ў Менску. Скончыў Беларускую акадэмію мастацтваў па спэцыяльнасьці "рэжысура драмы", вучыўся тры курсы ў Інстытуце культуры па спэцыяльнасьці "кіраўнік самадзейнага тэатра". Свой першы гурт "Пьяные гости" стварыў у 1988 годзе ў расейскім горадзе Ламаносаў (Арыніенбаўм). Запісаў у яго складзе тры касэтныя магнітальбомы (на CD перавыдадзены трэці канцэртны альбом "Уровень жизни"). Стала па-беларуску піша з 1997 году. Браў удзел ва ўсіх значных беларускіх супольных праектах на мяжы стагодзьдзяў: "Народны альбом", "Я нарадзіўся тут", "Сьвяты вечар", "Скрыпка дрыгвы" (ня выдадзены). У 2000 годзе стварыў уласны гурт Pomidor/OFF. Першы альбом "Сьвята пакрадзенае" атрымаў спэцыяльны прыз ад газэты "Наша Ніва" на цырымоніі "Рок-Каранацыя-2002", другі альбом"Патас/Попс/Прапаганда" трапіў у тройку лепшых альбомаў 2011 году па вэрсіі сайту Experty.by, песьня "Дым" была прызнана "Песьняй году" на "Рок-Каранацыі-2011", а гурт Памідорава атрымаў Галоўную рок-Карону, як "Гурт году".
Як журналіст супрацоўнічаў з радыёстанцыяй "Беларуская маладзёжная", "Радыё 101,2", "Радыё Рацыя", "Радыё Свабода", "Эўрапейскім радыё для Беларусі", тэлеканаламі БТ і СТВ. Працаваў ды-джэем на Радыё Бі-Эй, "Альфа-радыё", музычным рэдактарам радыё "Мэлёдыі века". Вядучы шэрагу буйных беларускіх рок-фэстываляў, у тым ліку "Басовішча", "Рок за Баброў", "Рок па вакацыях" ды іншых.

Белы сьпіс: Алег Хаменка (5)

Fri, 28 Sep 2012 12:35:00 +0400

Завяршальная перадача, прысьвечаная гурту "Палац" ды яго лідэру Алегу Хаменку. Гаворку павядзем пра фэстывальны рух у Беларусі, да якога Алег мае самае непасрэднае дачыненьне. Выканаўца сам стаяў ля вытокаў некалькіх беларускіх незалежных фэстаў, таму добра разумее, якая гэта няпростая справа зладзіць буйное музычнае мерапрыемства. Асабліва ў беларускіх умовах.

Белы сьпіс: Алег Хаменка (4)

Thu, 27 Sep 2012 11:38:00 +0400

Менавіта Алегу Хаменку належыць ідэя ўнікальнага аўдыёпраекту, які завецца проста і ясна - "Беларускія народныя казкі". Дзіва, але да яго ні ў каго не даходзілі рукі сістэматызаваць нашы казкі, начытаць іх у студыі ды выдаць на дысках для шырокага распаўсюду. Такім чынам, атрымалася цэлая сэрыя з шасьці дыскаў. Праект сёлета набыў працяг. Сваю самую ўлюбёную казку Хаменка вырашыў запісаць і выдаць асобна, настолькі яго кранула закладзеная ў ёй народная філязофія. У цэлым жа, творца ставіць простую задачу, калі гадзінамі праседжвае ў студыі над запісам голасу - зрабіць нашы казкі больш вядомымі, бо яны, на думку музыканта-казачніка недаацэненыя нават самімі беларусамі.

Белы сьпіс: Алег Хаменка (3)

Wed, 26 Sep 2012 10:49:00 +0400

Ад самага часу заснаваньня гурту музыкі з "Палацу" літаральна прадзіраліся праз закасьцянеласьць публікі, бо прапанавалі уласны ўнікальны прадукт, якога дасюль яшчэ ніхто не вырабляў. Паказальным тут будзе прыклад аднаго з народных сьпеваў, які якраз з падачы Хаменкі і кампаніі набыў другое дыханьне ды ўвайшоў у рэпертуар шматлікіх фолькавых ды каля-фолькавых каманд. Аднак, у час яго прэмеры музыкі пацярпелі фіяска.

Белы сьпіс: Алег Хаменка (2)

Tue, 25 Sep 2012 14:01:00 +0400

Сёньня ў "Белым сьпісе" слухаем гурт "Палац", які стаў фактычна заснавальнікам новага жанру. Тое, што прапанавалі музыкі ў сваіх першых запісах яшчэ на пачатку 90-х аніяк не ўпісвалася ў музычную сістэму каардынат, як у айчынную, так і наогул сусьветную. Таму канчаткова сваімі яны ў ніводнай тусоўцы яны не сталі. Затое гурт можна было пабачыць, як на "Славянскім базары", так і на "Басовішчы". А яшчэ лідэр каманды Алег Хаменка абсалютна ўсьведамляе, у чым галоўная бяда эстраднікаў і шмат якіх рокераў зь Беларусі і прапануе сваё вырашэньне гэтай праблемы.

Белы сьпіс: Алег Хаменка (1)

Mon, 24 Sep 2012 11:56:00 +0400

Алег Хаменка - саліст, аўтар музыкі, кіраўнік гурту "Палац".

У школьныя часы вучыўся па клясе трамбону, у 1990 годзе (зь перапынкам на службу ў войску) скончыў Менскі інстытут культуры, эстрадна-духавую катэдру.

У 2007 годзе скончыў асьпірантуру ва Ўнівэрсытэце мастацтваў і культуры (культаралёгія). Цяпер працуе тут на катэдры мэнэджмэнту сацыяльнай і культурнай дзейнасьці і вядзе курс "Тэхналёгіі прадусаваньня".

У музыцы з 1987 году.

У 1992 годзе - у гурце "Палац", назву якога і прыдумаў.

Лічыцца стваральнікам новага кірунку ў сучаснай музыцы - "фольк-мадэрн". Разам з гуртом выступаў на розных фэстах, зладжаных дзяржаўнымі ўстановамі й мясцовымі ўладамі - "Зов Полесья", "Маладзечна", "Славянскі базар", прадстаўляў краіну на міжнародных фэстывалях, неаднаразовы ўдзельнік "Басовішча".

Уваходзіў у Рэспубліканскую грамадзкую раду па справах культуры і мастацтва пры Савеце міністраў (2010).

Арганізатар фэстывалю Bela Music, кансультант і вядучы шэрагу іншых буйных беларускіх незалежных фэстываляў.

Аўтар і вядучы шэрагу праграмаў на тэлебачаньні і радыё (тэлеканал "Лад", "Радыё Мінск", "Аўтарадыё", "Радыё Рацыя").

Суаўтар (разам з Алесем Камоцкім) афіцыйнага гімну ХК "Дынама" (Менск).

Аўтар праекту "Беларускія народныя казкі".

Белы сьпіс: Сяргей Скрыпнічэнка (5)

Fri, 21 Sep 2012 11:59:00 +0400

Апошняя праграма з цыклю, прысьвечанага лідэру гурта zygimont VAZA. На Сяргея Скрыпнічэнку яшчэ на самым пачатку моцна паўплывала творчасьць "Бонды", што добра чуваць на самых першых запісах каманды, што ўвайшлі ў альбом "Шыба 48". Музыканты натуральным чынам разглядалі сябе, як падаўжальнікаў той справы, якую пачалі рабіць першыя беларускамоўныя гурты. З большасьцю цяперашніх камандаў такога не адбываецца, - канстатуе Скрыпа.

Белы сьпіс: Сяргей Скрыпнічэнка (4)

Thu, 20 Sep 2012 11:42:00 +0400

У сярэдзіне 90-х лідэр гурта zygimont VAZA Сяргей Скрыпнічэнка, ён жа Скрыпа, скончыў экспэрымэнты са словам, каб ізноў выказаць сваю пазіцыю наконт таго, што дзеецца наўкол. З гэтага атрымаўся пэўна самы жорсткі альбом у дыскаграфіі каманды, які зваўся "Трэцяя вайна".

Белы сьпіс: Сяргей Скрыпнічэнка (3)

Wed, 19 Sep 2012 10:52:00 +0400

zygimont VAZA яшчэ на мяжы 80-х і 90-х дакладна акрэсьліў сваю пазsцыю, выступаючы на нелегальных тады фэстах антыкамуністычнай скіраванасьці. Сваё стаўленьне музыкі не хавалі. На вокладцы альбому 1994 году разам з звыклымі падзякамі родным і сябрам зьмяшчаецца і антырэспект - у прыватнасьці прэзыдэнту, адміністрацыі ды камуністам. Дайшло да адкрытага варагаваньня. Пасьля аднаго з выступаў музыкі нават апынуліся ў пастарунку. Лідэр гурта Сяргей Скрыпнічэнка задумаў адзначыць 23 лютага не як сьвята савецкай арміі, а як дзень Беларускай краёвай абароны. Канцэрт забараніў Савецкі райвыканкам, які тады ўзначальваў Сяргей Калякін. Але маладзёнаў гэта не спыніла і яны перанесьлі апаратуру на балькон кватэры аднаго з удзельнікаў гурта. ..

Белы сьпіс: Сяргей Скрыпнічэнка (2)

Tue, 18 Sep 2012 11:03:00 +0400

Герой гэтага тыдня - гурт zygimont VAZA. У час запісу свайго другога альбому, названага "Стаціс", і сэрыі канцэртаў, лідэр каманды Сяргей Скрыпнічэнка зразумеў, што слухачоў не кранае яго паэтыка. Ён ня кінуў музыку і наважыўся на зусім небанальны ўчынак. Але пра ўсё па парадку.

Белы сьпіс: Сяргей Скрыпнічэнка (1)

Mon, 17 Sep 2012 14:03:00 +0400

Сяргей "Скрыпа" Скрыпнічэнка нарадзіўся 27 траўня 1971 году.

Бацька — вядомы мастак Георгі Скрыпнічэнка, маці Натальля выкладала сцэнічную мову ў Інстытуце культуры.

Навучаўся ў мастацка-рэстаўрацыйнай вучэльні ў Міры, Беларускай акадэміі мастацтваў, пэдагагічным унівэрсытэце ў Вільні.

У рок-музыцы з 1987 году. Заснавальнік, гітарыст , вакаліст, аўтар тэкстаў і музыкі гурта žygimont VAZA, у якім у розныя часы ўдзельнічалі такія музыканты, як Уладзімер Мулявін-малодшы, Аляксандар Памідораў, Вольга Самусік, Кастусь Калесьнікаў, Маша Яр ды іншыя.

Мае ў дыскаграфіі 11 альбомаў, запісаных з гуртом, і некалькі сольных працаў, запісаных пад імем Skrypa MX. Зараз працуе над новым праектам The Blue Devils.

Сяргей — дызайнэр. Разам з жонкай, мастачкай Юліяй Галавіной, заснаваў дызайнэрскі лэйбл "Tank Press". Аздабляў дыскі беларускіх выканаўцаў. Адзін з апошніх творчых праектаў — калекцыйная калода ігральных картаў, распрацаваная да 600-годзьдзя бітвы пад Грунвальдам.

Белы сьпіс: Павал Аракелян (5)

Fri, 14 Sep 2012 10:29:00 +0400

Апошняя праграма з цыклю, прысьвечанага Паўлу Аракеляну - музыку, які ў свае 26 год дасягнуў таго, чаго іншаму і не марылася і стаў джазмэнам сусьветнага ўзроўню.

Белы сьпіс: Павал Аракелян (4)

Thu, 13 Sep 2012 11:45:00 +0400

Чацьверты выпуск праграмы, прысьвечанай беларускаму музыканту Павалу Аракеляну. Размова пра тое, чаму Паша вырашыў адмовіцца ад кантактаў з дзяржаўнымі СМІ.

Белы сьпіс: Павал Аракелян (3)

Wed, 12 Sep 2012 11:03:00 +0400

Трэцяя праграма з цыклю, прысьвечанага беларускаму музыканту Паўлу Аракеляну.

"Белы сьпіс": Павал Аракелян (2)

Tue, 11 Sep 2012 11:26:00 +0400

Другая частка праграмы, якая апавядае пра беларускага музыканта Паўла Аракеляна.

"Белы сьпіс": Павал Аракелян (1)

Fri, 07 Sep 2012 17:41:00 +0400

Павал Аракелян — кампазытар, саксафаніст, клявішнік, вакаліст

Нарадзіўся ў 1985 годзе ў Баку. У Менску жыве з 1988 году.

Скончыў музычную школу па клясе фартэпіяна, эстраднае аддзяленьне музычнай вучэльні імя Глінкі па клясе саксафона (2004).

З 17 гадоў выступае на фэстывалях міжнароднага роўню.

Граў у складзе такіх гуртоў, як Apple Tea, "Камэрата", Svet Boogie Band, як запрошаны музыка граў разам з Дэборай Браўн, Майкам дэль Фэро, Сяргеем Манукянам ды іншымі зоркамі.

Быў лідэрам гурту Speakeasy, стваральнікам праекту The Stop Time. Цяпер мае ўласны праект The Outsiders, зь якім атрымаў першую прэмію джазавага конкурсу на фэсьце "Усадьба. Джаз" (2008), апярэдзіўшы тысячы прэтэндэнтаў.

Неаднаразова прызнаваўся лепшым джазмэнам і саксафаністам Беларусі. У 2010 годзе выйшаў дэбютны дыск Outsiders "The Ballad Of The Lost Musician".

У 2011 годзе запісаў музычны нарыс "Ластаўка" на вершы Ўладзімера Някляева.

У 2012 годзе запрошаны ў склад гуртоў "Крыві" і "Крамбамбуля".